||ಶ್ರೀರಾಮ ಪಟ್ಟಾಭಿಷೇಕಃ||
||ಏಕತ್ರಿಂಶದುತ್ತರಶತತಮಸ್ಸರ್ಗಃ||

ಶಿರಸ್ಯಂಜಲಿ ಮಾಧಾಯ ಕೈಕೇಯ್ಯಾನನ್ದವರ್ಧನಃ|
ಬಭಾಷೇ ಭರತೋ ಜ್ಯೇಷ್ಠಂ ರಾಮಂ ಸತ್ಯಪರಾಕ್ರಮಮ್||1||

ಪೂಜಿತಾ ಮಾಮಿಕಾ ಮಾತಾ ದತ್ತಂ ರಾಜ್ಯಂ ಮಿದಂ ಮಮ|
ತದ್ದದಾಮಿ ಪುನಸ್ತುಭ್ಯಂ ಯದಾ ತ್ವಂ ಅದದಾಮಮ||2||

ಧುರಮೇಕಾಕಿನಾ ನ್ಯಸ್ತಾ ಮೃಷಭೇಣ ಬಲೀಯಸಾ|
ಕಿಶೋರೀವ ಗುರುಂ ಭಾರಂ ನವೋಢುಂ ಅಹಮುತ್ಸಹೇ||3||

ವಾರಿವೇಗೇನ ಮಹತಾ ಭಿನ್ನಸ್ಸೇತುರಿವ ಕ್ಷರನ್|
ದುರ್ಬನ್ಧನ ಮಿದಂ ಮನ್ಯೇ ರಾಜ್ಯಚ್ಚಿದ್ರಮಸಂವೃತಮ್||4||

ಗತಿಂ ಖರ ಇವಾಶ್ವಸ್ಯ ಹಂಸಸ್ಯೇವ ಚ ವಾಯಸಃ|
ನಾನ್ವೇತು ಮುತ್ಸಹೇ ರಾಮ ತವಮಾರ್ಗಮರಿಂದಮ||5||

ಯಥಾ ಚಾರೋಪಿತೋ ವೃಕ್ಷೋ ಜಾತಶ್ಚಾನ್ತರ್ನಿವೇಶನೇ|
ಮಹಾಂಶ್ಚ ಸು ದುರಾಹಾರೋ ಮಹಾಸ್ಕನ್ಧಪ್ರಶಾಖವಾನ್||6||

ಶೀರ್ಯೇತ ಪುಷ್ಪಿತೋ ಭೂತ್ವಾ ನ ಫಲಾನಿ ಪ್ರದರ್ಶಯನ್|
ತಸ್ಯ ನಾನುಭವೇ ದರ್ಥಂ ಯಸ್ಯ ಹೇತೋಃ ಸ ರೋಪ್ಯತೇ||7||

ಏಷೋಪಮಾ ಮಹಾಬಾಹೋ ತ್ವಮರ್ಥಂ ವೇತ್ತುಮರ್ಹಸಿ|
ಯದ್ಯಸ್ಮಾನ್ಮನುಜೇಂದ್ರ ತ್ವಂ ಭಕ್ತಾನ್ಭೃತ್ಯಾನ್ನಶಾಧಿ ಹಿ ||8||

ಜಗದದ್ಯಾಭಿಷಿಕ್ತಂ ತ್ವಾಮನುಪಶ್ಯತು ಸರ್ವತಃ|
ಪ್ರತಪನ್ತ ಮಿವಾದಿತ್ಯಂ ಮಧ್ಯಾಹ್ನೇ ದೀಪ್ತ ತೇಜಸಮ್||9||

ತೂರ್ಯ ಸಂಘಾತ ನಿರ್ಘೋಷೈಃ ಕಾಂಚೀನೂಪುರನಿಸ್ವ್ಯನೈಃ|
ಮಧುರೈರ್ಗೀತಶಬ್ದೈಶ್ಚ ಪ್ರತಿಬುಧ್ಯಸ್ವ ರಾಘವ||10||

ಯಾವದಾವರ್ತತೇ ಚಕ್ರಂ ಯಾವತೀಚ ವಸುಂಧರಾ|
ತಾವತ್ವಮಿಹ ಸರ್ವಸ್ಯ ಸ್ವಾಮಿತ್ಯಮನುವರ್ತಯ||11||

ಭರತಸ್ಯ ವಚಃ ಶ್ರುತ್ವಾ ರಾಮಃ ಪರಪುರಂಜಯಃ|
ತಥೇತಿ ಪ್ರತಿಜಗ್ರಾಹ ನಿಷಸಾದಾಸನೇ ಶುಭೇ||12||

ತತಃ ಶತ್ರುಘ್ನವಚನಾನ್ ನಿಪುಣಾಃ ಶ್ಮಶ್ರುವರ್ಧಕಾಃ|
ಸುಖಹಸ್ತಾಃ ಸುಶೀಘ್ರಾಶ್ಚ ರಾಘವಂ ಪರ್ಯುಪಾಸತ||13||

ಪೂರ್ವಂ ತು ಭರತೇ ಸ್ನಾತೇ ಲಕ್ಷ್ಮಣೇ ಚ ಮಹಾಬಲೇ|
ಸುಗ್ರೀವೇ ವಾನರೇನ್ದ್ರೇ ಚ ರಾಕ್ಷಸೇನ್ದ್ರೇ ವಿಭೀಷಣೇ||14||

ವಿಶೋಧಿತಜಟಃ ಸ್ನಾತಃ ಚಿತ್ರಮಾಲ್ಯಾನುಲೇಪನಃ|
ಮಹಾರ್ಹವಸನೋ ರಾಮಃ ತಸ್ಥೌ ತತ್ರ ಶ್ರಿಯಾ ಜ್ವಲನ್||15||

ಪ್ರತಿಕರ್ಮಚ ರಾಮಸ್ಯ ಕಾರಯಾಮಾಸ ವೀರ್ಯವಾನ್|
ಲಕ್ಷ್ಮಣಸ್ಯ ಚ ಲಕ್ಷ್ಮೀವಾನ್ ಇಕ್ಷ್ವಾಕು ಕುಲವರ್ಧನಃ||16||

ಪ್ರತಿಕರ್ಮ ಚ ಸೀತಾಯಾಃ ಸರ್ವಾ ದಶರಥಸ್ತ್ರಿಯಃ|
ಆತ್ಮನೈವ ತದಾ ಚಕ್ರುರ್ಮನಸ್ವಿನ್ಯೋ ಮನೋಹರಮ್||17||

ತತೋ ವಾನರಪತ್ನೀನಾಂ ಸರ್ವಸಾಮೇವ ಶೋಭನಮ್|
ಚಕಾರ ಯತ್ನಾತ್ ಕೌಸಲ್ಯಾ ಪ್ತ್ರಹೃಷ್ಟಾ ಪುತ್ರಲಾಲಸಾ||18||

ತತಃ ಶತ್ರುಘ್ನವಚನಾತ್ ಸುಮನ್ತ್ರೋ ನಾಮಸಾರಥಿಃ|
ಯೋಜಯಿತ್ವಾsಭಿಚಕ್ರಾಮ ರಥಂ ಸರ್ವಾಂಗಶೋಭನಮ್||19||

ಅರ್ಕಮಣ್ಡಲ ಸಂಕಾಶಂ ದಿವ್ಯಂ ದೃಷ್ಟ್ವಾ ರಥೋತ್ತಮಮ್|
ಆರುರೋಹ ಮಹಾಬಾಹೂ ರಾಮಃ ಸತ್ಯಪರಾಕ್ರಮಃ||20||

ಸುಗ್ರೀವೋ ಹನುಮಾಂಶ್ಚೈವ ಮಹೇನ್ದ್ರ ಸದೃಶದ್ಯುತೀ|
ಸ್ನಾತೌ ದಿವ್ಯನಿಭೈರ್ವಸ್ರೈರ್ಜಗ್ಮತುಃ ಶುಭಕುಣ್ಡಲೌ||21||

ವರಾಭರಣ ಸಂಪನ್ನಾ ಯುಯುಃ ತಾಃ ಶುಭಕುಣ್ಡಲೌ|
ಸುಗ್ರೀವಪತ್ನ್ಯಃ ಸೀತಾ ಚ ದ್ರಷ್ಠುಂ ನಗರಮುತ್ಸುಕಾಃ||22||

ಅಯೋಧ್ಯಾಯಾಂ ತು ಸಚಿವಾ ರಾಜ್ಞೋ ದಶರಥಸ್ಯ ಯೇ|
ಪುರೋಹಿತಂ ಪುರಸ್ಕೃತ್ಯ ಮನ್ತ್ರಯಾಮಾಸುರರ್ಥವತ್||23||

ಅಶೋಕೋ ವಿಜಯಶ್ಚೈವ ಸುಮನ್ತ್ರಶ್ಚೈವ ಸಂಗತಾಃ|
ಮನ್ತ್ರಯನ್ ರಾಮವೃಧ್ಯರ್ಥಂ ವೃಧ್ಯರ್ಥಂ ನಗರಸ್ಯ ಚ||24||

ಸರ್ವಮೇವಾಭಿಷೇಕಾರ್ಥಂ ಜಯಾರ್ಹಸ್ಯ ಮಹಾತ್ಮನಃ|
ಕರ್ತು ಮರ್ಹಥ ರಾಮಸ್ಯ ಯದ್ಯನ್ಮಂಗಳಪೂರ್ವಕಮ್||25||

ಇತಿ ಮನ್ತ್ರಿಣಃ ಸರ್ವೇ ಸನ್ದಿಶ್ಯತು ಪುರೋಹಿತಮ್|
ನಗರಾನ್ ನಿರ್ಯಯುಸ್ತೂರ್ಣಂ ರಾಮದರ್ಶನ ಬುದ್ಧಯಃ||26||

ಹರಿಯುಕ್ತಂ ಸಹಸ್ರಾಕ್ಷೋ ರಥಮಿನ್ದ್ರ ಇವಾನಘಃ|
ಪ್ರಯಯೌ ರಥಮಾಸ್ಥಾಯ ರಾಮೋನಗರಮುತ್ತಮಮ್||27||

ಜಗ್ರಾಹ ಭರತೋರಶ್ಮೀನ್ ಶತ್ರುಘ್ನಶ್ಛತ್ರಮಾದದೇ|
ಲಕ್ಷ್ಮಣೋವ್ಯಜನಂ ತಸ್ಯ ಮೂರ್ಥ್ನಿಸಮರ್ಯವೀಜಯತ್||28||

ಶ್ವೇತಂ ಚ ವ್ಯಾಲವ್ಯಜನಂ ಜಗ್ರಾಹ ಪುರತಃ ಸ್ಥಿತಃ |
ಅಪರಂ ಚಂದ್ರಸಂಕಾಶಂ ರಾಕ್ಷಸೇನ್ದ್ರೋ ವಿಭೀಷಣಃ||29||

ಋಷಿಸಂಘೈಃ ತದಾಕಾಶೇ ದೇವೈಶ್ಚ ಸಮರುದ್ಗಣೈಃ|
ಸ್ತೂಯಮಾನಸ್ಯ ರಾಮಸ್ಯ ಶುಶ್ರುವೇ ಮಧುರಧ್ವನಿಃ||30||

ತತಃ ಶತ್ರುಂ ಜಯಂ ನಾಮ ಕುಂಜರಂ ಪರ್ವತೋಪಮಂ|
ಅರುರೋಹಮಹಾತೇಜಾಃ ಸುಗ್ರೀವಃ ಪ್ಲವಗರ್ಷಭಃ||31||

ನವನಾಗಸಹಸ್ರಾಣಿ ಯುಯುರಾಸ್ಥಾಯ ವಾನರಾಃ|
ಮಾನುಷಂ ವಿಗ್ರಹಂ ಕೃತ್ವಾ ಸರ್ವಾಭರಣಭೂಷಿತಾಃ||32||

ಶಬ್ದ ಶಬ್ದಪ್ರಣಾದೈಶ್ಚ ದುನ್ದುಭೀನಾಂ ಚ ನಿಸ್ಸ್ವನೈಃ|
ಪ್ರಯಯೌ ಪುರುಷವ್ಯಾಘ್ರಃ ತಾಂ ಪುರೀಂ ಹರ್ಮ್ಯಮಾಲಿನೀಮ್||33||

ದದೃಶುಸ್ತೇ ಸಮಾಯಾನ್ತಂ ರಾಘವಂ ಸ ಪುರಸ್ಸರಮ್|
ವಿರಾಜಮಾನಂ ವಪುಷಾ ರಥೇನಾತಿರಥಂ ತದಾ||34||

ತೇ ವರ್ಥಯಿತ್ವಾ ಕಾಕುತ್‍ಸ್ಥಂ ರಾಮೇಣ ಪ್ರತಿವನ್ದಿತಾಃ|
ಅನುಜಗ್ಮುರ್ಮಹಾತ್ಮಾನಂ ಭ್ರಾತೃಭಿಃಪರಿವಾರಿತಮ್||35||

ಅಮಾತ್ಯೈರ್ಬ್ರಾಹ್ಮಣೈಶ್ಚೈವ ತಥಾ ಪ್ರಕೃತಿಭಿರ್ವೃತಃ|
ಶ್ರಿಯಾ ವಿರುರುಚೇ ರಾಮೋ ನಕ್ಷತ್ರೈರಿವ ಚನ್ದ್ರಮಾಃ||36||

ಸಪುರೋಗಾಮಿಭಿಃ ತೂರ್ಯೈಃ ತಾಳಸ್ವಸ್ತಿಕ ಪಾಣಿಭಿಃ |
ಪ್ರವ್ಯಾಹರದ್ಭಿರ್ಮುದಿತೈಃ ಮಂಗಳಾನಿ ಯಯೌ ವೃತಃ||37||

ಅಕ್ಷತಂ ಜಾತರೂಪಂ ಚ ಗಾನಃ ಕನ್ಯಾಸ್ತಥಾ ದ್ವಿಜಾಃ|
ನರಾಮೋದಕಹಸ್ತಾಶ್ಚ ರಾಮಸ್ಯ ಪುರತೋ ಯಯುಃ||38||

ಸಖ್ಯಂ ಚ ರಾಮಃ ಸುಗ್ರೀವೇ ಪ್ರಭಾವಂ ಚಾನಿಲಾತ್ಮಜೇ|
ವಾನರಾಣಾಮ್ ಚ ತತ್ಕರ್ಮ ರಾಕ್ಷಸಾನಾಂ ಚ ತದ್ಬಲಮ್||39||

ವಿಭೀಷಣಸ್ಯ ಸಂಯೋಗಮಾಚಚಕ್ಷೇ ಚ ಮನ್ತ್ರಿಣಾಮ್|
ಶ್ರುತ್ವಾ ತು ವಿಸ್ಮಯಂ ಜಗ್ಮುಃ ಅಯೋಧ್ಯಾಪುರವಾಸಿನಃ||40||

ದ್ಯುತಿಮಾನೇತದಾಖ್ಯಾಯ ರಾಮೋ ವಾನರಸಂವೃತಃ|
ಹೃಷ್ಟಪುಷ್ಟಜನಾಕೀರ್ಣಾಂ ಅಯೋಧ್ಯಾಂ ಪ್ರವಿವೇಶ ಹ||41||

ತತೋ ಹ್ಯಭ್ಯುಚ್ಛ್ರಯನ್ ಪೌರಾಃ ಪತಾಕಾಸ್ತೇ ಗೃಹೇ ಗೃಹೇ|
ಇಕ್ಷ್ವಾಕಾಧ್ಯುಷಿತಂ ರಮ್ಯಂ ಆಸಸಾದಪಿತುರ್ಗೃಹಮ್||42||

ಅಥಾಬ್ರವೀತ್ ರಾಜಸುತೋ ಭರತಂ ಧರ್ಮಿಣಾಂ ವರಂ|
ಅರ್ಥೋಪಹಿತಯಾ ವಾಚಾ ಮಧುರಂ ರಘುನನ್ದನಃ||43||

ಪಿತುರ್ಭವನಮಾಸಾದ್ಯ ಪ್ರವಿಶ್ಯ ಚ ಮಹಾತ್ಮನಃ|
ಕೌಸಲ್ಯಾಂ ಚ ಸುಮಿತ್ರಾಂಚ ಕೈಕೇಯೀಂ ಅಭಿವಾದ್ಯಚ||44||

ಯಚ್ಚಮದ್ಭವನಂ ಶ್ರೇಷ್ಠಂ ಸಾಶೋಕವನಿಕಂ ಮಹತ್|
ಮುಕ್ತಾವೈಡೂರ್ಯಸಂಕೀರ್ಣಂ ಸುಗ್ರೀವಾಯ ನಿವೇದಯ||45||

ತಸ್ಯ ತದ್ವಚನಂ ಶ್ರುತ್ವಾ ಭರತಃ ಸತ್ಯವಿಕ್ರಮಃ|
ಪಾಣೌ ಗೃಹೀತ್ವಾ ಸುಗ್ರೀವಂ ಪ್ರವಿವೇಶ ತಮಾಲಯಮ್||46||

ತತಃ ತೈಲಪ್ರದೀಪಾಂಶ್ಚ ಪರ್ಯಂಕಾಸ್ತರಣಾನಿ ಚ|
ಗೃಹೀತ್ವಾ ವಿವಿಶುಃ ಕ್ಷಿಪ್ರಂ ಶತ್ರುಘ್ನೇನ ಪ್ರಚೋದಿತಾಃ||47||

ಉವಾಚ ಚ ಮಹಾತೇಜಾಃ ಸುಗ್ರೀವಂ ರಾಘವಾನುಜಃ|
ಅಭಿಷೇಕಾಯ ರಾಮಸ್ಯ ದೂತಾ ನಾಜ್ಞಾಪಯ ಪ್ರಭೋ||48||

ಸೌವರ್ಣಾನ್ ವಾನರೇನ್ದ್ರಾಣಾಂ ಚತುರ್ಣಾಂ ಚತುರೋ ಘಟಾನ್|
ದದು ಕ್ಷಿಪ್ರಂ ಸ ಸುಗ್ರೀವಃ ಸರ್ವರತ್ನವಿಭೂಷಿತಾನ್||49||

ಯಥಾ ಪ್ರತ್ಯೂಷಸಮಯೇ ಚತುರ್ಣಾಂ ಸಾಗರಾಮ್ಭಸಾಮ್|
ಪೂರ್ಣೈರ್ಘಟೈಃ ಪ್ರತೀಕ್ಷಧ್ವಂ ತಥಾ ಕುರುತ ವಾನರಾಃ||50||

ಏವಮುಕ್ತಾ ಮಹಾತ್ಮಾನೋ ವಾನರಾ ವಾರಣೋಪಮಾಃ|
ಉತ್ಪೇತುರ್ಗಗನಂ ಶೀಘ್ರಂ ಗರುಡಾ ಇವ ಶೀಘ್ರಗಾಃ||51||

ಜಾಂಬವಾಂಶ್ಚ ಹನುಮಾಂಶ್ಚ ವೇಗದರ್ಶೀ ಚ ವಾನರಃ|
ಋಷಭಶ್ಚೈವ ಕಲಶಾಂ ಜಲಪೂರ್ಣಾನ್ ಅಥಾನಯನ್||52||

ನದೀಶತಾನಾಂ ಪಂಚಾನಾಂ ಜಲಂ ಕುಮ್ಭೇಷು ಚಾಹರನ್|
ಪೂರ್ವಾತ್ ಸಮುದ್ರಾತ್ ಕಲಶಂ ಜಲಪೂರ್ಣಮಥಾsನಯತ್||53||

ಸುಷೇಣಃ ಸತ್ವಸಂಪನ್ನಃ ಸರ್ವರತ್ನ ವಿಭೂಷಿತಮ್|
ಋಷಭೋ ದಕ್ಷಿಣಾತ್ತೂರ್ಣಂ ಸಮುದ್ರಾತ್ ಜಲಮಾಹರತ್||54||

ರಕ್ತಚನ್ದನಶಾಖಾಭಿಃ ಸಂವೃತಂ ಕಾಂಚನಂ ಘಟಮ್|
ಗನಯಃ ಪಶ್ಚಿಮಾತ್ ತೋಯಂ ಆಜಹಾರಮಹಾರ್ಣವಾತ್||55||

ರತ್ನಕುಮ್ಭೇನ ಮಹತಾ ಶೀತಂ ಮಾರುತವಿಕ್ರಮಃ|
ಉತ್ತರಾಚ್ಚ ಜಲಂ ಶೀಘ್ರಂ ಗರುಡಾನಿಲವಿಕ್ರಮಃ||56||

ಅಜಹಾರ ಸಧರ್ಮಾತಾ ನಳಃ ಸರ್ವಗುಣಾನ್ವಿತಃ|
ತತಸ್ತೈಃ ವಾನರಶ್ರೇಷ್ಠೈಃ ಆನೀತಂ ಪ್ರೇಕ್ಷ್ಯ ತಜ್ಜಲಮ್||57||

ಅಭಿಷೇಕಾಯ ರಾಮಸ್ಯ ಶತ್ರುಘ್ನಃ ಸಚಿವೈಃ ಸಹ|
ಪುರೋಹಿತಾಯ ಶ್ರೇಷ್ಠಾಯ ಸುಹೃದ್ಭ್ಯಶ್ಚ ನ್ಯವೇದಯತ್||58||

|| ಶ್ರೀರಾಮಪಟ್ಟಾಭಿಷೇಕಘಟ್ಟಃ ||

ತತಸ್ಸ ಪ್ರಯತೋ ವೃದ್ಧೋ ವಶಿಷ್ಠೋ ಬ್ರಾಹ್ಮಣೈಸ್ಸಹ |
ರಾಮಂ ರತ್ನಮಯೇ ಪೀಠೇ ಸಹಸೀತಂ ನ್ಯವೇಶಯತ್ ||59||

ವಸಿಷ್ಠೋ ವಾಮದೇವಶ್ಚ ಜಾಬಾಲಿರಥ ಕಾಶ್ಯಪಃ |
ಕಾತ್ಯಾಯನಸ್ಸುಯಜ್ಞಶ್ಚ ಗೌತಮೋ ವಿಜಯಸ್ತಥಾ ||60||

ಅಭ್ಯಷಿಂಚನ್ ನರವ್ಯಾಘ್ರಂ ಪ್ರಸನ್ನೇನ ಸುಗಂಧಿನಾ |
ಸಲಿಲೇನ ಸಹಸ್ರಾಕ್ಷಂ ವಸವೋ ವಾಸವಂ ಯಥಾ ||61||

ಋತ್ವಿಗ್ಬಿಃ ಬ್ರಾಹ್ಮಣೈಃ ಪೂರ್ವಂ ಕನ್ಯಾಭಿಃ ಮಂತ್ರಿಭಿಸ್ತದಾ |
ಯೋಧೈ ಶ್ಚೈವಾಭ್ಯಷಿಂಚಂಸ್ತೇ ಸಂಪ್ರಹೃಷ್ಟಾಃ ಸನೈಗಮೈಃ ||62||

ಸರ್ವೌಷ ಧಿರಸ್ತೆರ್ದಿವ್ಯೈಃ ದೈವತೇರ್ನಭಸಿ ಸ್ಥಿತೈಃ |
ಚತುರ್ಭಿರ್ಲೋಕಪಾಲೈಶ್ಚ ಸರ್ವೇರ್ದೇವೈಶ್ಚ ಸಂಗತೈಃ ||63||

ಬ್ರಹ್ಮಣಾನಿರ್ಮಿತಂ ಪೂರ್ವಂ ಕಿರೀಟಂ ರತ್ನಶೋಭಿತಮ್|
ಅಭಿಷಿಕ್ತಃ ಪುರಾ ಯೇನ ಮನುಸ್ತಂ ದೀಪ್ತ ತೇಜಸಮ್||64||

ತಸ್ಯಾನ್ವವಾಯೇ ರಾಜಾನಃ ಕ್ರಮಾತ್ ಯೇನಾಭಿಷೇಚಿತಾಃ|
ಸಭಾಯಾಂ ಹೇಮಕ್ಲಪ್ತಾಯಾಂ ಶೋಭಿತಾಯಾಂ ಮಹಾಧನೈಃ||65||

ರತ್ನೈರ್ನಾನಾವಿಧೈಶ್ಚೈವ ಚಿತ್ರಿತಾಯಾಂ ಸುಶೋಭನೈಃ|
ನಾನಾರತ್ನಮಯೇ ಪೀಠೇ ಕಲ್ಪಯಿತ್ವಾ ಯಥಾವಿಥಿ||66||

ಕಿರೀಟೇನ ತತಃ ಪಶ್ಚಾತ್ ವಸಿಷ್ಟೇನ ಮಹಾತ್ಮನಾ|
ಋತ್ವಿಗ್ಭಿರ್ಭೂಷಣೈಶ್ಚೈವ ಸಮಯೋಕ್ಷ್ಯತ ರಾಘವಃ||67||

ಛತ್ರಂ ತು ತಸ್ಯ ಜಗ್ರಾಹ ಶತ್ರುಘ್ನಃ ಪಾಂಡುರಂ ಶುಭಮ್|
ಶ್ವೇತಂ ಚ ವಾಲವ್ಯಜನಂ ಸುಗ್ರೀವೋ ವಾನರೇಶ್ವರಃ ||68||

ಅಪರಂ ಚಂದ್ರ ಸಂಕಾಶಂ ರಾಕ್ಷಸೇಂದ್ರೋ ವಿಭೀಷಣಃ |
ಮಾಲಾಂ ಜ್ವಲಂತೀಂ ವಪುಷಾ ಕಾಂಚನೀಂ ಶತಪುಷ್ಕರಾಮ್ ||69||

ರಾಘವಾಯ ದದೌ ವಾಯುಃ ವಾಸವೇನ ಪ್ರಚೋದಿತಃ |
ಸರ್ವರತ್ನ ಸಮಾಯುಕ್ತಂ ಮಣಿರತ್ನ ವಿಭೀಷಿತಮ್ ||70||

ಮುಕ್ತಾಹಾರಂ ನರೇಂದ್ರಾಯ ದದೌ ಶಕ್ರ ಪ್ರಚೋದಿತಃ |
ಪ್ರಜಗುರ್ದೇವಗಂಧರ್ವಾಃ ನನೃತುಶ್ಚಾಪ್ಸರೋಗಣಾಃ ||71||

ಅಭಿಷೇಕೇ ತದರ್ಹಸ್ಯ ತದಾ ರಾಮಸ್ಯ ಧೀಮತಃ|
ಭೂಮಿಃ ಸಸ್ಯವತೀಶ್ಚೈವ ಫಲವಂತಶ್ಚ ಪಾದಪಾಃ || 72 ||

ಗಂಧವಂತಿ ಚ ಪುಷ್ಪಾಣಿ ಬಭೂವೂ ರಾಘವೋತ್ಸವೇ |
ಸಹಸ್ರಶತಮಶ್ವಾನಾಂ ಧೇನೂನಾಂ ಚ ಗವಾಂ ತಥಾ ||73||

ದದೌ ಶತಮ್ ವೃಷಾನ್ ಪೂರ್ವಂ ದ್ವಿಜೇಭ್ಯೋ ಮನುಜರ್ಷಭಃ
ತ್ರಿಂಶತ್ಕೋಟೀರ್ಹಿರಣ್ಯಸ್ಯ ಬ್ರಾಹ್ಮಣೇಭ್ಯೋ ದದೌ ಪುನಃ ||74||

ನಾನಾಭರಣ ವಸ್ತ್ರಾಣಿ ಮಹಾರ್ಹಾಣಿ ಚ ರಾಘವಃ |
ಅರ್ಕರಸ್ಮಿ ಪ್ರತೀಕಾಶಂ ಕಾಂಚನೀಂ ಮಣಿವಿಗ್ರಹಮ್ || 75||

ಸುಗ್ರೀವಾಯ ಸ್ರಜಂ ದಿವ್ಯಾಂ ಪ್ರಾಯಚ್ಚನ್ಮನುಜರ್ಷಭಃ |
ವೈಡೂರ್ಯಮಣಿ ಚಿತ್ರೇ ಚ ವಜ್ರರತ್ನ ವಿಭೂಷಿತೇ ||76||

ವಾಲಿಪುತ್ರಾಯ ಧ್ರುತಿಮಾನ್ ಅಂಗದಾಯಾಂಗದೇ ದದೌ |
ಮಣಿ ಪ್ರವರಜುಷ್ಟಂಚ ಮುಕ್ತಾಹಾರಮನುತ್ತಮಮ್ ||77||

ಸೀತಾಯೈ ಪ್ರದದೌ ರಾಮಃ ಚಂದ್ರರಶ್ಮಿಸಮಪ್ರಭಮ್ |
ಅರಜೇ ವಾಸಸೀ ದಿವ್ಯೇ ಶುಭಾನ್ಯಾಭರಣಾನಿ ಚ ||78||

ಅವೇಕ್ಷಮಾಣಾ ವೈದೇಹೀ ಪ್ರದದೌ ವಾಯುಸೂನವೇ |
ಅವಮುಚ್ಯಾತ್ಮನಃ ಕಂಠಾತ್ ಹಾರಂ ಜನಕನಂದಿನೀ ||79||

ಅವೈಕ್ಷತ ಹರೀನ್ ಸರ್ವಾನ್ ಭರ್ತಾರಂ ಚ ಮುಹುರ್ಮುಹುಃ|
ತಾಮಿಂಗಿತಜ್ಞಸ್ಸಂಪ್ರೇಕ್ಷ್ಯ ಬಭಾಷೇ ಜನಕಾತ್ಮಜಾಮ್ ||80||

ಪ್ರದೇಹಿ ಸುಭಗೇ ಹಾರಂ ಯಸ್ಯ ತುಷ್ಟಾಸಿ ಭಾಮಿನಿ |
ಪೌರುಷಂ ವಿಕ್ರಮೋ ಬುದ್ಧಿಃ ಯಸ್ಮಿನ್ನೇತಾನಿ ಸರ್ವಶಃ ||81||

ದದೌ ಸಾ ವಾಯುಪುತ್ರಾಯ ತಂ ಹಾರಮಸಿತೇಕ್ಷಣಾ |
ಹನುಮಾಂಸ್ತೇನ ಹಾರೇಣ ಶುಶುಭೇ ವಾನರರ್ಷಭಃ || 82 ||

ಚಂದ್ರಾಂಶುಚಯಗೌರೇಣ ಶ್ವೇತಾಭ್ರೇಣ ಯಥಾಚಲಃ |
ತತೋ ದ್ವಿವಿದಮೈಂದಾಭ್ಯಾಂ ನೀಲಾಯ ಚ ಪರಂತಪಃ ||83||

ಸರ್ವಾನ್ ಕಾಮಗುಣಾನ್ ವೀಕ್ಷ್ಯ ಪ್ರದದೌ ವಸುದಾಧಿಪ |
ಸರ್ವವಾನರವೃದ್ಧಾಶ್ಚ ಯೇ ಚಾನ್ಯೇ ವಾನರೇಶ್ವರಾಃ || 84||

ವಾಸೋಭಿರ್ಭೂಷಣೈಶ್ಚೈವ ಯಥಾರ್ಹಂ ಪ್ರತಿಪೂಜಿತಾಃ |
ವಿಭೀಷಣೋಥ ಸುಗ್ರೀವೋ ಹನುಮಾನ್ ಜಾಂಬವಾಂಸ್ತಥಾ ||85||

ಸರ್ವವಾನರ ಮುಖ್ಯಾಶ್ಚ ರಾಮೇಣಾ ಕ್ಲಿಷ್ಟಕರ್ಮಣಾ |
ಯಥಾರ್ಹಂ ಪೂಜಿತಾಃ ಸರ್ವೈಃ ಕಾಮೈ ರತ್ನೈಶ್ಚ ಪುಷ್ಕಲೈಃ ||86||

ಪ್ರಹೃಷ್ಟಮನಸ್ಸರ್ವೇ ಜಗ್ಮುರೇವ ಯಥಾಗತಮ್ |
ದೃಷ್ಟಾ ಸರ್ವೇ ಮಹಾತ್ಮಾನಂ ತತಸ್ತೇ ಪ್ಲವಗರ್ಷಭಾಃ ||87||

ವಿಸೃಷ್ಟಾಃ ಪಾರ್ಥಿವೇಂದ್ರೇಣ ಕಿಷ್ಕಿಂಧಾಮಭ್ಯುಪಾಗಮನ್ |
ಸುಗ್ರೀವೋ ವಾನರಶ್ರೇಷ್ಠೋ ದೃಷ್ಟ್ವಾ ರಾಮಾಭಿಷೇಚನಮ್ ||88||

ಲಬ್ಧ್ವಾ ಕುಲಧನಂ ರಾಜಾ ಲಂಕಾಂ ಪ್ರಾಯಾದ್ವಿಭೀಷಣಃ |
ಸರಾಜ್ಯ ಮಖಿಲಂ ಶಾಸನ್ ನಿಹತಾರಿರ್ಮಹಾಯಶಾಃ ||89||

ರಾಘವಃ ಪರಮೋದಾರಃ ಶಶಾಸ ಪರಯಾಮುದಾ |
ಉವಾಚ ಲಕ್ಷ್ಮಣಂ ರಾಮೋ ಧರ್ಮಜ್ಞಂ ಧರ್ಮ ವತ್ಸಲಃ ||90||

ಅತಿಷ್ಠ ಧರ್ಮಜ್ಞ ಮಯಾ ಸಹೇಮಾಂ
ಗಾಂ ಪೂರ್ವರಾಜಾಧ್ಯುಷಿತಾಂ ಬಲೇನ |
ತುಲ್ಯಂ ಮಯಾ ತ್ವಂ ಪಿತೃಭಿಃ ಧೃತ ಯಾ
ತಾಂ ಯೌವರಾಜ್ಯೇ ಧುರಮುಧ್ವಹಸ್ವ ||91||

ಸರ್ವಾತ್ಮನಾ ಪರ್ಯನುನೀಯಮಾನೋ
ಯಥಾ ನ ಸೌಮಿತ್ರಿರುಪೈತಿ ಯೋಗಮ್ |
ನಿಯುಜ್ಯಮಾನೋಪಿ ಚ ಯೌವರಾಜ್ಯೇ
ತತೋಭ್ಯಷಿಂಚದ್ಭರತಂ ಮಹಾತ್ಮಾ || 92 ||

ಪೌಂಡರೀಕಾಶ್ವಮೇಧಾಭ್ಯಾಂ ವಾಜಪೇಯೇನ ಚಾಸಕೃತ್ |
ಅನ್ಯೈಶ್ಚ ವಿವಿಧೈರ್ಯಜ್ಞೈಃ ಅಯಜತ್ ಪಾರ್ಥಿವರ್ಷಭಃ ||93||

ರಾಜ್ಯಂ ದಶ ಸಹಸ್ರಾಣಿ ಪ್ರಾಪ್ಯ ವರ್ಷಾಣಿ ರಾಘವಃ |
ಶತಾಶ್ವಮೇಧಾನಾಜಹ್ರೇ ಸದಶ್ವಾನ್ ಭೂರಿದಕ್ಷಿಣಾನ್ ||94||

ಆಜಾನುಲಂಬ ಬಾಹುಃ ಸಮಹಾಸ್ಕಂಧಃ ಪ್ರತಾಪವಾನ್ |
ಲಕ್ಷ್ಮಣಾನುಚರೋ ರಾಮಃ ಪೃಥ್ವೀಮನ್ವಪಾಲಯತ್ || 95||

ರಾಘವಶ್ಚಾಪಿ ಧರ್ಮಾತ್ಮಾ ಪ್ರಾಪ್ಯ ರಾಜ್ಯಮನುತ್ತಮಮ್ |
ಈಜೈ ಬಹುವಿಧೈರ್ಯಜ್ಞೈಃ ಸಸುಹೃತ್ ಜ್ಞಾತಿಬಾಂಧವಃ ||96||

ನ ಪರ್ಯದೇವನ್ ವಿಧವಾ ನ ಚ ವ್ಯಾಳಕೃತಂ ಭಯಮ್ |
ನ ವ್ಯಾಧಿಜಂ ಭಯಂ ವಾಪಿ ರಾಮೇ ರಾಜ್ಯಂ ಪ್ರಶಾಸತಿ ||97||

ನಿರ್ದಸ್ಯುರಭವಲ್ಲೋಕೋ ನಾನರ್ಥಃ ಕಂಚಿದಸ್ಪೃಶತ್ |
ನ ಚ ಸ್ಮ ವೃದ್ಧಾ ಬಾಲಾನಾಂ ಪ್ರೇತಕಾರ್ಯಾಣಿ ಕುರ್ವತೇ ||98||

ಸರ್ವಂ ಮುದಿತ ಮೇವಾಸೀತ್ ಸರ್ವೋ ಧರ್ಮಪರೋ ಭವತ್ |
ರಾಮಮೇವಾನುಪಶ್ಯಂತೋ ನಾಭ್ಯಹಿಂಸನ್ ಪರಸ್ಪರಮ್ ||99||

ಆಸನ್ ವರ್ಷ ಸಹಸ್ರಾಣಿ ತಥಾ ಪುತ್ತ್ರಸಹಸ್ರಿಣಃ |
ನಿರಾಮಯಾ ವಿಶೋಕಾಶ್ಚ ರಾಮೇ ರಾಜ್ಯಂ ಪ್ರಶಾಸತಿ ||100||

ರಾಮೋ ರಾಮೋ ರಾಮ ಇತಿ ಪ್ರಜಾನಾಂ ಅಭವನ್ ಕಥಾಃ |
ರಾಮಭೂತಂ ಜಗದಭೂತ್ ರಾಮೇ ರಾಜ್ಯಂ ಪ್ರಶಾಸತಿ ||101||

ನಿತ್ಯ ಪುಷ್ಪಾ ನಿತ್ಯ ಫಲಾಃ ತರವಃ ಸ್ಕಂಧವಿಸ್ತೃತಾಃ |
ಕಾಲೇ ವರ್ಷೀಚ ಪರ್ಜನ್ಯಃ ಸುಖಸ್ಪರ್ಶಶ್ಚ ಮಾರುತಃ || 102||

ಬ್ರಾಹ್ಮಣಾಃ ಕ್ಷತ್ರಿಯಾಃ ವೈಶ್ಯಾಃ ಶುದ್ರಾ ಲೋಭವಿವರ್ಜಿತಾಃ |
ಸ್ವಕರ್ಮಸು ಪ್ರವರ್ತಂತೇ ತುಷ್ಟಾಃ ಸ್ವೈರೇವ ಕರ್ಮಭಿಃ ||103||

ಆಸನ್ ಪ್ರಜಾ ಧರ್ಮರತಾ ರಾಮೇ ಶಾಸತಿ ನಾನೃತಾಃ |
ಸರ್ವೇ ಲಕ್ಷಣ ಸಂಪನ್ನಾಃ ಸರ್ವೇ ಧರ್ಮ ಪರಾಯಣಾಃ ||104||

ದಶವರ್ಷ ಸಹಸ್ರಾಣಿ ದಶವರ್ಷ ಶತಾನಿಚ |
ಭಾತೃಭಿಸ್ಸಹಿತಃ ಶ್ರೀಮಾನ್ ರಾಮೋ ರಾಜ್ಯಮಕಾರಯತ್ ||105||

ಧರ್ಮ್ಯಂ ಯಶಸ್ಯಮಾಯುಷ್ಯಂ ರಾಜ್ಞಾಂ ಚ ವಿಜಯಾವಹಮ್ |
ಆದಿಕಾವ್ಯಮಿದಂ ತ್ವಾರ್ಷಂ ಪುರಾ ವಾಲ್ಮೀಕಿನಾ ಕೃತಮ್ ||106||

ಯಃ ಪಠೇಚ್ಛೃಣುಯಾಲ್ಲೋಕೇ ನರಃ ಪಾಪಾದ್ವಿಮುಚ್ಯತೇ |
ಪುತ್ರಕಾಮಾಸ್ತು ಪುತ್ರಾನ್ ವೈ ಧನಕಾಮೋ ಧನಾನಿ ಚ ||107||

ಲಭತೇ ಮನುಜೇ ಲೋಕೇ ಶ್ರುತ್ವಾ ರಾಮಾಭಿಷೇಚನಮ್ |
ಮಹೀಮ್ ವಿಜಯತೇ ರಾಜಾ ರಿಪೂಂಶ್ಚಾಪ್ಯಧಿತಿಷ್ಠತಿ ||108||

ರಾಘವೇಣ ಯಥಾ ಮಾತಾ ಸುಮಿತ್ರಾ ಲಕ್ಷ್ಮಣೇನ ಚ |
ಭರತೇನೈವ ಕೈಕೇಯೀ ಜೀವಪುತ್ರಸ್ತಥಾ ಸ್ತ್ರಿಯಃ ||109||

ಶ್ರುತ್ವಾ ರಾಮಾಯಣಮಿದಂ ದೀರ್ಘಮಾಯುಶ್ಚ ವಿಂದತಿ |
ರಾಮಸ್ಯ ವಿಜಯಂಚೈವ ಸರ್ವಮಕ್ಲಿಷ್ಟಕರ್ಮಣಃ ||110||

ಶೃಣೋತಿ ಯ ಇದಂ ಕಾವ್ಯಂ ಅರ್ಷಂ ವಾಲ್ಮೀಕಿನಾ ಕೃತಮ್
ಶ್ರದ್ಧದಾನೋ ಜಿತಕ್ರೋಧೋ ದುರ್ಗಾಣ್ಯತಿತರತ್ಯಸೌ ||111||

ಸಮಾಗಮ್ಯ ಪ್ರವಾಸಾಂತೇ ಲಭತೇ ಚಾಪಿ ಬಾಂಧವೈಃ
ಪ್ರಾರ್ಥಿತಾಂಶ್ಚ ವರಾನ್ ಸರ್ವಾನ್ ಪ್ರಾಪ್ನುಯಾದಿಹ ರಾಘವಾತ್ || 112 ||

ಶ್ರವಣೇನ ಸುರಾಸ್ಸರ್ವೇ ಪ್ರೀಯಂತೇ ಸಂಪ್ರಶೃಣ್ವತಾಂ |
ವಿನಾಯಕಾಶ್ಚ ಶಾಮ್ಯಂತಿ ಗೃಹೇ ತಿಷ್ಠಂತಿ ಯಸ್ಯವೈ ||113||

ವಿಜಯೇತ ಮಹೀಮ್ ರಾಜಾ ಪ್ರವಾಸೀ ಸ್ವಸ್ತಿಮಾನ್ ವ್ರಜೇತ್ |
ಸ್ತ್ರಿಯೋ ರಜಸ್ವಲಾಃ ಶ್ರುತ್ವಾ ಪುತ್ರಾನ್ ಸೂಯುರನುತ್ತಮಾಮ್ ||114||

ಪೂಜಯಂಶ್ಚ ಪಠಂಶ್ಚೇಮಮ್ ಇತಿಹಾಸಂ ಪುರಾತನಮ್ |
ಸರ್ವಪಾಪಾತ್ ಪ್ರಮುಚ್ಯೇತ ದೀರ್ಘಮಾಯುರವಾಪ್ನುಯಾತ್ ||115||

ಪ್ರಣಮ್ಯ ಶಿರಸಾ ನಿತ್ಯಂ ಶ್ರೋತವ್ಯಂ ಕ್ಷತ್ರಿಯೈರ್ ದ್ವಿಜಾತ್ |
ಇಶ್ವರ್ಯಂ ಪುತ್ರಲಾಭಶ್ಚ ಭವಿಷ್ಯತಿ ನ ಸಂಶಯಃ ||116||

ರಾಮಾಯಣಮಿದಂ ಕೃತ್ಸ್ನಂ ಶುಣ್ವತಃ ಪಠತಸ್ಸದಾ |
ಪ್ರೀಯತೇ ಸತತಂ ರಾಮಃ ಸಹಿ ವಿಷ್ಣುಃ ಸನಾತನಃ ||117||

ಆದಿದೇವೋ ಮಹಾಬಾಹುಃ ಹರಿರ್ನಾರಾಯಣಃ ಪ್ರಭುಃ |
ಸಾಕ್ಷಾದ್ರಾಮೋ ರಘುಶ್ರೇಷ್ಠಃ ಶೇಷೋ ಲಕ್ಷ್ಮಣ ಉಚ್ಯತೇ ||118||

ಕುಟುಂಬ ವೃದ್ಧಿಂ ಧನಧಾನ್ಯವೃದ್ಧಿಂ
ಸ್ತ್ರಿಯಶ್ಚ ಮುಖ್ಯಾಃ ಸುಖಮುತ್ತಮಂ ಚ|
ಶ್ರುತ್ವಾ ಶುಭಂ ಕಾವ್ಯಮಿದಂ ಮಹಾರ್ಥಂ
ಪ್ರಾಪ್ನೋತಿ ಸರ್ವಾಂ ಭುವಿಚಾರ್ಥ ಸಿದ್ಧಿಂ ||119||

ಆಯುಷ್ಯ ಮಾರೋಗ್ಯಕರಂ ಯಶಸ್ಯಂ
ಸೌಭ್ರಾತೃಕಂ ಬುದ್ಧಿಕರಂ ಸುಖಂಚ |
ಶ್ರೋತವ್ಯ ಮೇತನ್ನಿಯಮೇನ ಸದ್ಭಿಃ
ಆಖ್ಯಾನಮೋಜಸ್ಕರಮೃದ್ಧಿಕಾಮೈಃ ||120||

ಏವಮೇತತ್ ಪುರಾವೃತ್ತಂ ಆಖ್ಯಾನಂ ಭದ್ರಮಸ್ತು ವಃ |
ಪ್ರವ್ಯಾಹರತ ವಿಸ್ರಬ್ಧಂ ಬಲಂ ವಿಷ್ಣೋಃ ಪ್ರವರ್ಥತಾಮ್ ||121||

ದೇವಾಶ್ಚ ಸರ್ವೇ ತುಷ್ಯಂತಿ ಶ್ರವಣಾದ್ಗ್ರಹಣಾತ್ ತಥಾ |
ರಾಮಾಯಣಸ್ಯ ಶ್ರವಣಾತ್ ತುಷ್ಯಂತಿ ಪಿತರಸ್ತಥಾ || 122||

ಭಕ್ತ್ಯಾ ರಾಮಸ್ಯ ಯೇ ಚೇಮಾಂ ಸಂಹಿತಾಂ ಋಷಿಣಾ ಕೃತಾಮ್ |
ಲೇಖಯಂತೀಹ ಚ ವರಾಃ ತೇಷಾಂ ವಾಸಃ ತ್ರಿವಿಷ್ಟಪೇ || 123 ||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕಿಯೇ ಆದಿಕಾವ್ಯೇ
ಯುದ್ಧಕಾಂಡೇ ಶ್ರೀರಾಮಪಟ್ಟಾಭಿಷೇಕೋನಾಮ ಅಂತಿಮಸರ್ಗಃ ||
ಸಮಾಪ್ತಂ

-----

||ಓಮ್ ತತ್ ಸತ್ ||